औचित्य

यो  कस्तो  द्वन्द  हो ?

अस्तित्व  र  औचित्य  बीच को

के तिम्रो मूर्तता नै महत्वपुर्ण हो?

के तिम्रो सार्थक हुनुका मानकहरु छैनन् ?

कतै  तिम्रा  भावनाहरु  कुनै  नामी  गीत  को  उपेक्षित  अन्तरा  जस्ता  त  छैनन् ?

लोकप्रियता  को  भागीदार  हुनुको  हर्ष  मनाउने  कि

त्यो  गीत  को  अंग  हुँदा  पनि  भुलिएको  मा  विस्मात

 

यो  कस्तो  द्वन्द  हो  ?

पहिचान  र   फगत  उल्लेख  बीच  को

के  तिमि  पराकम्पन  जस्तो  त  हैनौ ?

महसुस  त  गरिन्छौ  तिमी , तर  सम्झनाको  जरो  अर्कै  भूकम्पको  भागमा  पर्छ

कतै  तिम्रा  उपलब्धि  बिजगणित  का  समीकरण  जस्ता  त  होइनन ?

भयङ्कर  तर  काल्पनिक

के  १०  जनाले  १००  दिन  मा  बनाउने

तिम्रो  कल्पनाको  संसारको  महल

तिमीले  एक्लै  १०००  दिनमा  बनाउन  सक्छौ ?

 

यो  कस्तो  द्वन्द  हो  ?

चिन्ह  र  निर्भरता  बीचको

कैयौं  मोड  र  चोकहरुका  नाम  हुदैनन्

तिनीहरु  दिशा  बताउन  मात्र  उल्लेख  गरिन्छन

कैयौं  भने  बिना कुना,  बिना घुम्ती  प्रसिद्ध  छन्

तिम्रा  सोल्टिमोडहरु , तिम्रा  एकान्तकुनाहरु

 

यो  कस्तो  द्वन्द  हो ?

तिम्रो  अभिमान  र  वास्तविकता बीचको

तिमी  आफूले  जिउन  खनेको  बाटोलाई  असन - इन्द्रचोक  गल्ली  ठान्छौ

व्यस्त  भव्य , हिंंड्न  मात्र  पनि  प्रतिष्पर्धा  गर्नुपर्ने

कतै  तिमी  नक्साल भगवती - दुरसंचार मार्ग जस्तो

एक्सिलरेटर  को  एक  झट्का  मा  पार  भइने

गुमनाम , सतही , साधारण , बैकल्पिक सडक त होइनौ?